Gjykata e Posaçme kundër Korrupsionit dhe Krimit të Organizuar ka shpallur vendimin përfundimtar ndaj një grupi të strukturuar kriminal, të përfshirë në trafikun ndërkombëtar të drogës dhe pastrimin e parave.
Të pandehurit Flori Pali dhe Fredi Pali janë dënuar për veprimtarinë kriminale të zhvilluar mes Shqipërisë dhe Norvegjisë. Flori Pali u dënua me 11 vite burg, ndërsa Fredi Pali me 6 vite e 8 muaj, të dy për disa vepra penale, përfshirë “trafikim narkotikësh”, “pastrim parash” dhe “anëtarësim në grup të strukturuar kriminal”. Dënimet u ulën me 1/3 për shkak të gjykimit të shkurtuar.
Gjykata urdhëroi edhe konfiskimin e pasurive, përfshirë një automjet dhe një sipërfaqe toke në Ishull Shëngjin, në pronësi të të dënuarve.
Po në këtë çështje, më herët është dënuar përfundimisht edhe shtetasja Anita Adilaj me 6 vite e 8 muaj burg, për përfshirje në të njëjtin rrjet kriminal, me aktivitet në tregtinë e drogës dhe transferimin e parave nga Norvegjia drejt Shqipërisë.
Hetimi u zhvillua në bashkëpunim me autoritetet norvegjeze dhe zbuloi një rrjet të gjerë trafikimi e pastrimi parash që operonte nga viti 2018 deri në 2019, me baza në Stavanger dhe lidhje në Shqipëri. Flori Pali rezulton të ketë qenë drejtuesi i këtij grupi, i cili trafikoi sasi të mëdha droge dhe përmes personave të ndryshëm transferonte të ardhurat kriminale në Shqipëri, të menaxhuara më pas nga Fredi Pali. Adilaj, ndërkohë, luante rolin e “llogaritares” së grupit në Norvegji.
