Një zjarr i fuqishëm ka përfshirë pasditen e së dielës tregun ambulant në zonën e plazhit në Durrës, duke shkaktuar panik mes pushuesve dhe tregtarëve. Tregu, i ngritur me konstruksione të përkohshme prej llamarine, përbëhet nga mbi 20 dyqane që operojnë jo vetëm gjatë sezonit veror.
Flakët u përhapën me shpejtësi, duke detyruar autoritetet të bllokojnë qarkullimin në një nga akset më të rëndësishme të zonës turistike, rrugën “Pavarësia”. Mjete zjarrfikëse nga qyteti, plazhi, porti dhe Kavaja janë angazhuar për shuarjen e zjarrit, ndërkohë që tymi i dendur ka mbuluar një pjesë të konsiderueshme të zonës përreth.
Shkaku i zjarrit mbetet ende i paqartë. Burime nga vendngjarja nuk përjashtojnë mundësinë që ai të jetë shkaktuar nga një shkëndijë elektrike, për shkak të instalimeve të pasigurta, ndërsa nuk përjashtohet as pista e një zjarri të qëllimshëm. Ngjarje të ngjashme janë regjistruar edhe në vitet e kaluara në këtë treg, duke shtuar dyshimet për një skenar të përsëritur, që lidhet me interesat për zhvillime të reja ndërtimore në zonë.
©️zërionline
