Një incident detar është regjistruar mëngjesin e sotëm pranë brigjeve të Durrësit, kur katamarani me vela “Plume”, që mban flamur francez, ka ngecur në cekinën e Currilave, në afërsi të zonës së njohur si “Sfinksi”.
Ngjarja ka ndodhur rreth orës 06:10, kur mjeti lundrues që ishte nisur nga Saranda me destinacion Shëngjinin, ka devijuar nga itinerari i sigurt duke mos respektuar bovën sinjalizuese që paralajmëron cekinën. Si pasojë, katamarani ka prekur fundin detar dhe ka mbetur i bllokuar.
Në bord ndodhej vetëm një person, shtetas i huaj, i cili fatmirësisht nuk ka pësuar lëndime. Menjëherë pas njoftimit, shërbimet e Kapitenerisë së Portit të Durrësit dhe Policia Kufitare kanë ndërhyrë për të dhënë ndihmën e nevojshme dhe për të shmangur ndonjë dëm të mëtejshëm në mjetin lundrues apo në mjedisin detar.
Pas ndërhyrjes së ekipeve të specializuara, katamarani është shoqëruar në Portin e Durrësit për verifikime të mëtejshme dhe për të sqaruar rrethanat e incidentit. Autoritetet po punojnë për të përcaktuar nëse ka pasur shkelje të rregullave të lundrimit dhe për të marrë masat e nevojshme administrative.
Ky është një tjetër rast që thekson rëndësinë e ndjekjes së sinjalistikës detare dhe respektimit të korridoreve të sigurta të lundrimit në zonat me thellësi të ulët.
©️zërionline
