Në ambientin solemn dhe me akustikë të veçantë të kishës Shën Lucia në Durrës, u zhvillua një nga mbrëmjet më të veçanta të Festivalit të XX Ndërkombëtar të Muzikës së Dhomës. Publiku pati mundësinë të përjetonte një performancë të rrallë dhe të ndjerë nga artisti i njohur gjerman në korno, Felix Klieser. Ai është një emër i spikatur në skenën ndërkombëtare të muzikës klasike.
Klieser, i njohur jo vetëm për virtuozitetin dhe ndjeshmërinë muzikore, por edhe për fuqinë frymëzuese të historisë së tij personale, pa duar ai interpretoi me një mjeshtëri të jashtëzakonshme një repertor që mbushi sallën me emocione.
Ai u shoqërua në piano nga pianistja e njohur nga Kosova, Lirika Pula Kasapolli, e cila plot finesë, solli një interpretim të harmonizuar me instrumentin e kornos. Bashkëpunimi i tyre artistik krijoi atmosferë, duke mbërthyer audiencën.
Koncerti ishte një dëshmi e fuqisë së muzikës për të bashkuar kultura dhe për të dhuruar përjetime dhe mesazhe të forta, në një vend simbolik siç është kisha Shën Lucia. Mbrëmja u mbyll mes duartrokitjeve dhe emocioneve që e bënë këtë event një nga kulmet e festivalit.
©️zërionline
