Një ngjarje e rëndë ka ndodhur këtë të premte në fshatin Labinot-Fushë të Elbasanit, ku dy fëmijë të mitur, vëllezër të moshës 7 dhe 9 vjeç, kanë humbur tragjikisht jetën pasi u mbytën në një grope fare pranë lumit Shkumbin.
Sipas informacioneve paraprake, vëllezërit ishin duke ruajtur bagëtitë e familjes në afërsi të lumit, së bashku me një të afërm të tyre. Në një moment, fëmijët kanë hyrë në ujë, nuk dihet në ç’rrethana, por janë mbytur.
Banorët e zonës dhe forcat e emergjencës u mobilizuan menjëherë pas marrjes së njoftimit, por përpjekjet për t’i shpëtuar rezultuan të pasuksesshme. Trupat e pajetë të fëmijëve u gjetën, ndërsa prindërit e tyre janë nën shok.
Ngjarja ka tronditur të gjithë komunitetin e Labinot-Fushës. Familjarët ndodhen në gjendje të rëndë psikologjike, ndërsa të afërm dhe bashkëfshatarë janë mbledhur për t’i qëndruar pranë familjes në këtë moment të dhimbshëm.
Grupi hetimor dhe shërbimet e Policisë ndodhen në vendngjarje dhe po punojnë për të sqaruar plotësisht rrethanat e aksidentit. Trupat e pajetë janë dërguar për ekspertizë mjeko-ligjore.
Ngjarja tragjike risjell në vëmendje nevojën për më shumë ndërgjegjësim dhe masa mbrojtëse për fëmijët në zonat rurale, ku shumë prej tyre ndihmojnë në punët e familjes, shpesh të pambrojtur përballë rreziqeve.
©️zërionline
