Policia vijon aksionin në kuadër të operacionit “Plazhi i lirë”, me fokus lirimin e hapësirave publike të zëna në mënyrë të paligjshme në vijën bregdetare të Durrësit. Kontrollet e fundit janë përqendruar në zonën e plazhit të Gjirit të Lalzit, ku janë konstatuar raste të tjera zënies së bregut pa leje.
Gjatë këtij operacioni, shërbimet e Stacionit të Policisë Manzë kanë konstatuar dhe sekuestruar 78 komplete çadrash dhe shezlongësh, të vendosura pa lejen përkatëse në hapësira publike.
Si rezultat i veprimeve të mëtejshme hetimore, janë proceduar penalisht në gjendje të lirë dy shtetas, 66 dhe 36 vjeç, të dy banues në Ishëm, Durrës.
Policia thekson se kontrollet do të vijojnë në gjithë gjatësinë e bregdetit, për të garantuar respektimin e ligjit, lirimin e hapësirave publike në funksion të pushuesve, si dhe për verifikimin e dokumentacionit dhe legalitetit të aktiviteteve që zhvillohen gjatë sezonit turistik.
Ky operacion është pjesë e një angazhimi të gjerë të strukturave të rendit për të mbrojtur aksesin e lirë të qytetarëve në plazhet publike dhe për të luftuar çdo formë abuzimi me hapësirat bregdetare.
©️zërionline
