Në kulmin e sezonit turistik, ku plazhi i Durrësit gumëzhin nga pushuesit, një tjetër realitet më pak i dukshëm dhe shpeshherë i injoruar del në pah, fëmijë të mitur që lypin rrugëve, të shtyrë nga vetë prindërit e tyre.
Policia e Durrësit bëri sot me dije se, gjatë patrullimeve të zakonshme në zonën e plazhit, specialistët për Hetimin e Krimeve të Stacionit të Policisë Plazh konstatuan tre fëmijë dhe pesë të rritur, duke lypur në rrugë. Dy prej të rriturve, A. B., 54 vjeç dhe E. A., 34 vjeç, dyshohet se shfrytëzonin fëmijët e tyre të mitur për të lypur, dhe ndaj tyre ka nisur procedimi penal në gjendje të lirë për veprën “Keqtrajtimi i të miturit”.
Policia ka referuar gjithashtu materialet edhe për pesë të rritur të tjerë, të moshave 21-40 vjeç, të kapur duke lypur në të njëjtën zonë.
Por përtej shifrave dhe kallëzimeve, ky rast ngre sërish pikëpyetje serioze dhe shqetësuese për një fenomen që vazhdon të përhapet. A është varfëria e mjaftueshme për të justifikuar shtyrjen e fëmijëve drejt rrugës dhe lypjes? Çfarë ndodh me dinjitetin dhe mirëqenien e tyre kur ata kthehen në mjete mbijetese për të rriturit?
Policia e Durrësit bën apel të qartë për qytetarët dhe sidomos për prindërit, duke theksuar se përfshirja e të miturve në veprimtari ekonomike të papërshtatshme për moshën e tyre është jo vetëm e ndaluar me ligj, por përbën një dëm të madh ndaj zhvillimit psiko-emocional të fëmijës.
Fatkeqësisht, rastet e tilla nuk janë të rralla, dhe ndërhyrja vetëm përmes ndëshkimit penal nuk është e mjaftueshme. Nevojitet një ndërhyrje më e thellë dhe sistematike, për të mbështetur familjet në nevojë, për të ndërgjegjësuar komunitetin dhe për të garantuar mbrojtjen e fëmijëve nga shfrytëzimi i çdo lloji.
Ndërkohë që prokuroria po ndjek procedurat ligjore për këtë rast, mbetet detyrë e institucioneve sociale, e shkollave, e bashkisë dhe e vetë shoqërisë që të ndalojnë këtë cikël të varfërisë dhe abuzimit. Sepse një fëmijë që lyp sot në rrugë, është një i rritur i ardhshëm që do t’i kërkojë llogari një shoqërie që e braktisi në vitet më të brishta të jetës së tij.
©️zërionline
