Një ngjarje e rëndë është regjistruar në fshatin Perlat, Sukth, ku një konflikt për motive të dobëta mes dy banorëve ka degjeneruar në dhunë të rrezikshme.
Policia e Durrësit njofton se ka vënë në pranga Benard Shkajoti, 32 vjeç, banues në Sukth, i cili akuzohet se ka tentuar të vrasë komshiun e tij, L. D., 40 vjeç, duke e goditur me automjet pas një debati të shoqëruar me fyerje e ofendime.
Si pasojë e goditjes, 40-vjeçari ka marrë dëmtime trupore dhe është transportuar me urgjencë në Spitalin Rajonal Durrës, ku po merr trajtim mjekësor.
Gjatë kontrolleve, efektivët e Komisariatit të Policisë Durrës dhe të Policisë Rrugore i kryen 32-vjeçarit testin e alkoolit, ku rezultoi se ai drejtonte automjetin në gjendje të dehur, me 0.92 mg/l alkool në frymëmarrje. Automjeti është sekuestruar në cilësinë e provës materiale.
I arrestuari do të përballet me akuzat për veprat penale “Vrasje me dashje”, mbetur në tentativë dhe “Drejtimi i automjetit në mënyrë të parregullt”.
Në bashkëpunim me Prokurorinë e Durrësit, vijojnë hetimet për dokumentimin e plotë të ngjarjes dhe sqarimin e rrethanave.
