Një operacion shpëtimi është zhvilluar natën e kaluar në det, pranë brigjeve të Qeparoit, ku dy turistë gjermanë mbetën të bllokuar me një gomone të vogël plastike.
Sipas njoftimit të Policisë Kufitare, rreth orës 22:20, Salla e Komisariatit të Policisë Himarë mori një telefonatë urgjente për dy persona që kërkonin ndihmë në zonë. Menjëherë, mjeti lundrues i policisë u nis drejt vendit të ngjarjes.
Rreth orës 22:45, patrulla identifikoi në det, rreth 100 metra larg bregut të Qeparoit, një gomone plastike rreth 2 metra të gjatë pa motor, e pajisur vetëm me lopata. Dy personat në bord rezultuan të ishin shkëputur nga jahti i tyre personal Tiaman, pasi era e fortë i kishte larguar dhe u kishte bërë të pamundur të lundronin drejt bregut.
Në mjetin e vogël ndodheshin shtetasit gjermanë Michael Berhard, 70 vjeç, dhe Dorothea Ute, 63 vjeçe, të cilët u shpëtuan nga policia kufitare. Pas ndërhyrjes, ata u transportuan në mënyrë të sigurt drejt Portit të Himarës, ku pas mesnate, mbërritën rreth orës 00:30 në gjendje të mirë shëndetësore.
Policia Kufitare bëri të ditur se falë reagimit të shpejtë dhe bashkëpunimit të ekipit të shpëtimit, situata u menaxhua me sukses, duke shmangur një incident të mundshëm detar.
©️zërionline
