46-vjeçari nga Durrësi shkoi për peligrinazh, por u vu në pranga, kërkohej prej 2 vitesh. Policia e Shtetit ka finalizuar një tjetër operacion të rëndësishëm për kapjen e personave të shpallur në kërkim.
Në kuadër të operacionit policor të koduar “Operacionalja 60”, strukturat e Drejtorisë së Forcës së Posaçme Operacionale në DPPSh, në bashkëpunim me Drejtorinë Vendore të Policisë Durrës, lokalizuan dhe arrestuan në Malin e Tomorrit shtetasin Dorian Beu, 46 vjeç, lindur dhe banues në Durrës.
I kërkuari lëvizte me automjet në zonën e malit ku ditëve të fundit ka fluks lëvizjesh për shkak të peligrinazhit në Tomorr, por u identifikua dhe u neutralizua nga forcat e policisë.
Ky shtetas ishte shpallur në kërkim që prej vitit 2023, pasi Gjykata e Posaçme kundër Korrupsionit dhe Krimit të Organizuar (GJKKO) i kishte caktuar masën e sigurisë “Arrest në burg” për akuzat:
- “Prodhimi dhe shitja e narkotikëve”,
- “Grupi i strukturuar kriminal”,
- “Kryerja e veprave kriminale nga grupi i strukturuar kriminal”.
Pas arrestimit, Seksioni për Hetimin e Narkotikëve pranë Policisë së Durrësit ekzekutoi vendimin e gjykatës, ndërsa materialet iu referuan Prokurorisë së Posaçme (SPAK) për hetime të mëtejshme.
Policia e Shtetit konfirmoi se operacionet për lokalizimin dhe kapjen e personave të shpallur në kërkim do të vijojnë pa ndërprerje në të gjithë territorin.
©️zërionline
