Policia e Durrësit ka dhënë sot detaje mbi arrestimin e ish-kryeinspektorit të Inspektoratit të Mbrojtjes së Territorit në këtë bashki, Ardian Halili, i cili akuzohet për ndërtime pa leje, korrupsion dhe shpërdorim të detyrës.
Sipas hetimeve, Halili u kap në flagrancë duke kryer punime ndërtimi pa leje në kompleksin turistik “Sent Michele Rezidencë”, në pronësi të tij. Objekti përfshin 11 kabina tip garsoniere, një godinë 2-katëshe, një fushë sportive dhe një pishinë, në një sipërfaqe prej 5,600 metrash katrorë.
Verifikimet e kryera nga policia dhe IKMT kanë treguar se ndërtimi ka nisur që prej vitit 2018, periudhë kur Halili mbante funksionin e kryeinspektorit të IMT-së në Bashkinë Durrës, deri në vitin 2021.
Materialet e çështjes i janë referuar Prokurorisë së Posaçme (SPAK) për tre vepra penale: “Ndërtim i paligjshëm me qëllim përfitimi”, “Korrupsion i zyrtarëve të lartë” dhe “Shpërdorim detyre”. Drejtori i Policisë së Durrësit, Vilson Bala, e cilësoi rastin si shembull të qartë të abuzimit nga funksionarë publikë.
“Ky është një rast tipik se si një funksionar i lartë shtetëror, i ngarkuar me detyrën për të parandaluar ndërtimet pa leje, ka zgjedhur të bëhet vetë shkelës i ligjit, duke përfituar personalisht nga abuzimi me detyrën”, deklaroi Bala.
Në të njëjtën konferencë për shtyp, DVP e Durrësit njoftoi edhe për finalizimin e një operacioni tjetër të koduar “The next Gun”, ku u arrestuan dy persona që qarkullonin të armatosur.
Në pranga ranë Aldi Mustafa, 39 vjeç, me precedentë të mëparshëm penalë dhe i shpallur në kërkim si i dyshuar për vendosjen e një tritoli në banesën e një 66-vjeçari në lagjen nr. 14 të Durrësit, si dhe një i ri 23-vjeçar Arbi Haxhiu. Të dyve iu gjet një armë zjarri pistoletë, me fishek në fole gati për qitje.
Policia konfirmoi se operacionet për goditjen e ndërtimeve pa leje dhe kapjen e personave me rrezikshmëri të lartë do të vijojnë me intensitet në të gjithë qarkun.
©️zërionline
