Erogen Vaso Brajoviç, i mbijetuari nga atentati tronditës që ndodhi ditën e djeshme në mes të qytetit të Shkodrës, ka dhënë dëshminë e tij përpara oficerëve të policisë kriminale. Ai dyshohet se ishte shënjestra kryesore e sulmit të armatosur që la të vdekur dy miqtë e tij, Armando Pali dhe Liridon Krahja.
Gjatë marrjes në pyetje, Brajoviç ka mohuar kategorikisht të ketë pasur ndonjë konflikt me autorin e dyshuar të ngjarjes, Ragip Gila. Ai ka tentuar të rrëzojë plotësisht alibinë e këtij të fundit, duke deklaruar se nuk e njeh dhe nuk ka asnjë lidhje me të.
“Nuk kam pasur kurrë konflikte me askënd. Jam biznesmen, qytetar i ndershëm dhe kam kontribute në komunitet”- mësohet të ketë deklaruar Brajoviç para grupit hetimor.
Ndërkohë, Ragip Gila, i arrestuar si autor i dyshuar i atentatit, pretendon se ka pasur një përplasje me Brajoviç disa muaj më parë, kur ky i fundit, sipas tij, i kishte ndërprerë rrugën me makinë të blinduar dhe e kishte fyer rëndë.
Por ky version i ngjarjes bie ndesh me deklarimet e Brajoviç, duke ngritur pikëpyetje të forta mbi motivin real të atentatit.
Burime nga grupi hetimor bëjnë me dije se policia po heton pistën e një vrasjeje me pagesë, ku Gila mund të ketë vepruar si ekzekutor dhe jo si person me konflikt të drejtpërdrejtë me viktimat apo me objektivin e atentatit.
©️zërionline
