Gjykata e Durrësit ka caktuar masën e sigurisë “arrest në burg” për 26-vjeçarin Leonardo Preza, i cili akuzohet se përdhunoi një turiste 18-vjeçare italiane në zonën e plazhit të Durrësit, ngjarje e ndodhur pak ditë më parë.
Gjatë seancës së sotme, i pandehuri është paraqitur para trupit gjykues, ku ka deklaruar se nuk mban mend asgjë nga ajo që ka ndodhur, pasi sipas tij ndodhej nën efektin e lëndëve narkotike.
Pas dëgjimit të palëve, gjyqtari i çështjes vendosi të pranojë kërkesën e prokurores, duke caktuar masën “Arrest me burg” dhe vleftësuar si të ligjshëm arrestimin e Prezës.
26-vjeçari, i martuar dhe me fëmijë, rezulton të ketë qenë më parë i dënuar për vepra të tjera penale, ndërsa këtë herë përballet me akuzën e “kryerjes së marrëdhënieve seksuale me dhunë me të rritura”, një vepër e parashikuar nga Kodi Penal me dënime të rënda me burgim.
Hetimet për rastin vijojnë, ndërkohë që po mbledhin prova të tjera për të dokumentuar në mënyrë të plotë ngjarjen e rëndë që tronditi opinionin publik.
©️zërionline
