Ngjarja e rëndë që tronditi qytetin e Korçës, këtë të enjte, ku tre motra të mitura përfunduan në spital pas konsumimit të disa karameleve të dyshimta, ka marrë përmasa të reja.
Burime policore bëjnë me dije se vajzat kishin konsumuar karamelet pranë një kazani mbeturinash, pa qenë të vetëdijshme për përmbajtjen e tyre. Dyshohet se ato përmbanin esencë të lëndëve narkotike, konkretisht cannabis.
Policia ka konfirmuar se karamelet vajzat i gjetën pranë vendit ku hidhen mbeturinat dhe se nuk rezulton t’u jenë dhënë nga ndonjë person tjetër. Forcat hetimore po punojnë për të përcaktuar mënyrën se si ato karamele kanë përfunduar aty dhe nëse bëhet fjalë për pakujdesi apo një veprim të qëllimshëm.
Gjendja shëndetësore e fëmijëve ka qenë shqetësuese, veçanërisht për vajzën më të vogël, vetëm 3 vjeç, e cila sipas burimeve nga bluzat e bardha ndodhet në reanimacionin e spitalit të Korçës dhe është intubuar për shkak të komplikacioneve. Ndërkohë, dy vajzat e tjera e kanë kaluar rrezikun për jetën dhe ndodhen në gjendje të qëndrueshme nën kujdesin e mjekëve.
Hetimet vijojnë intensivisht, ndërsa janë marrë në pyetje familjarët dhe të afërmit e të miturave, për të ndihmuar në zbardhjen e plotë të kësaj ngjarjeje të rëndë që ka ngritur shqetësim në opinionin publik.
©️zërionline
