Një zjarr ka përfshirë qendrën shëndetësore në Vadardhë të Sukthit, në Durrës, duke shkaktuar dëme të konsiderueshme materiale. Flakët kanë shkrumbuar pajisjet dhe dokumentacionin brenda godinës, pavarësisht ndërhyrjes së mjeteve zjarrfikëse.
Qendra ishte e mbyllur në momentin e ngjarjes, çka ka bërë që të mos ketë persona të lënduar. Menjëherë pas njoftimit, në vendngjarje kanë mbërritur zjarrfikësit, të cilët kanë arritur të shmangin përhapjen e flakëve drejt banesave përreth, pasi zjarri rrezikonte të përfshinte një zonë më të gjerë të banuar.
Dyshohet se vatra fillestare e zjarrit ka qenë në një ambient ngjitur, i cili përdorej si kopsht fëmijësh. Grupi hetimor ndodhet në terren dhe po punon për të zbardhur shkaqet dhe rrethanat e ngjarjes.
