Kushtet atmosferike në bregdetin e Durrësit janë përkeqësuar që prej mesditës së sotme, duke ndikuar drejtpërdrejt në aktivitetin detar. Sipas Kapitenerisë së Portit të Durrësit, anijet e vogla dhe mjetet e peshkimit kanë pezulluar lundrimet, ndërsa forca e detit në Gjirin e Durrësit ka arritur në 5 ballë dhe në det të hapur në 7 ballë. Era vijon të fryjë me intensitet nga drejtimi jugor.
Pavarësisht këtyre kushteve, tragetet e linjës Durrës–Bari, që nisen në orët e vona të mbrëmjes, pritet të operojnë normalisht, pasi sipas Kapitenerisë situata detare pritet të përmirësohet gradualisht drejt fundit të ditës.
Ndërkohë, flota e peshkimit ka ndërprerë aktivitetin dhe ka marrë masat e sigurisë për të shmangur incidente në kalata. Parashikimet e motit tregojnë se ditët në vijim do të karakterizohen nga paqëndrueshmëri atmosferike, duke kufizuar aktivitetin e peshkimit deri në fund të javës.
Në një njoftim zyrtar, Prefekti i Qarkut Durrës informon qytetarët se, bazuar në të dhënat e Institutit të Gjeoshkencave, Energjisë, Ujit dhe Mjedisit (IGEO), priten reshje shiu me intensitet të ulët deri mesatar në territorin e qarkut. Më 18 dhe 19 nëntor reshjet parashikohet të shtohen në intensitet, duke krijuar vështirësi në qarkullim, sidomos në zona të konsideruara të ndjeshme.
Prefekti u bën thirrje qytetarëve të tregojnë kujdes gjatë qarkullimit, të shmangin lëvizjet e panevojshme gjatë orëve me reshje dhe të ndjekin udhëzimet e strukturave të emergjencave civile.
“Strukturat e Prefekturës dhe ato të Mbrojtjes Civile mbeten në monitorim të pandërprerë të situatës meteorologjike dhe në gatishmëri të plotë për t’u përgjigjur ndaj çdo zhvillimi të mundshëm”, thuhet në njoftimin e Prefektit.
