Një ngjarje tronditëse ka tronditur Librazhdin, ku një çift të moshuarish u dërgua me urgjencë në spital në gjendje të rëndë, të dyshuar për intoksikim me medikamente. Vetëm pak orë më vonë, Policia zbuloi se pas këtij akti të rrezikshëm fshihej dhëndri i tyre, i cili, pasi i drogoi me një dozë të lartë qetësuesi, u vodhi paratë në banesë.
Policia e Librazhdit në bashkëpunim me Seksionin për Hetimin e Krimeve ndaj Personit në DVP Elbasan dhe nën drejtimin e Prokurorisë së Elbasanit, reagoi pas një ngjarjeje të rëndë që vuri në rrezik jetën e një çifti të moshuar, duke arrestuar 36-vjeçarin që u dha një dozë të lartë qetësuesesh të moshuarve dhe më pas u vodhi paratë. Në pranga ka rënë shtetasi I. K., 36 vjeç, i afërm i viktimave, dhëndri i tyre.
Çfarë ndodhi?
Pas njoftimit se dy bashkëshortë ishin paraqitur fillimisht në spitalin e Librazhdit e më pas në QSUT, në gjendje të rëndë shëndetësore dhe të dyshuar për intoksikim me medikamente, Policia organizoi menjëherë veprimet hetimore për të zbardhur rrethanat.
Hetimet e shpejta dhe të koordinuara zbuluan se 36-vjeçari dyshohet se u ka administruar të moshuarve një dozë të lartë valiumi, duke u shkaktuar dëmtime serioze shëndetësore, dhe më pas ka vjedhur një shumë parash në banesën e tyre.
Fatmirësisht, të moshuarit ndodhen nën kujdesin e mjekëve dhe jashtë rrezikut për jetën.
Në cilësinë e provës materiale u sekuestruan:
- Shuma e parave të vjedhura,
- Një telefon celular.
Materialet i janë referuar Prokurorisë së Elbasanit për procedime të mëtejshme.
Në vijim priten të tjera veprime hetimore për të sqaruar të gjitha rrethanat e ngjarjes dhe motivet që çuan dhëndrin të sulmojë dhe të vjedhë familjarët e tij.
