Një operacion i shpejtë dhe i koordinuar i Policisë së Fierit ka çuar në ndalimin e një personi të rrezikshëm që lëvizte i armatosur në zonën e Fermë Çlirimit. Informacionet operative për një shtetas që mbante armë pa leje nxitën strukturat policore të ndërhynin menjëherë, duke parandaluar një situatë që mund të përfundonte me pasoja të rënda.
Shërbimet e Forcës së Posaçme Operacionale, në bashkëpunim me Seksionin për Hetimin e Krimeve Kundër Personit dhe efektivët e Komisariatit të Policisë Fier, finalizuan operacionin e koduar “Pathway”, i cili çoi në prangosjen e Petrit Mërnicës, 57 vjeç, banues në fshatin Sulaj.
Gjatë kontrollit të ushtruar në një lokal në fshatin Fermë Çlirim, policia e kapi në flagrancë të armatosur, me një pistoletë dhe dy krëhëra me nga 7 fishekë secili, të cilat i mbante në çantën e dorës. Arma e zjarrit dhe municioni luftarak u sekuestruan në cilësinë e provës materiale.
I arrestuari rezulton i dënuar më parë për vrasje, ndërsa materialet procedurale i janë referuar Prokurorisë së Fierit për vijimin e hetimeve.
Burime policore bëjnë me dije se Petrit Mërnica është babai i Azgan Mërnicës, i cili një vit e gjysmë më parë vrau efektivin e Policisë së Shqiponjave në Fier, ngjarje që tronditi vendin.
