Salla e koncerteve Black Box u mbush mbrëmë me emocion, duartrokitje dhe tinguj që frymëzojnë. Shkolla artistike “Jan Kukuzeli” hapi zyrtarisht siparin e festave të 28-29 Nëntorit me koncertin festiv “Shqipëria në zemër, muzika në shpirt”.
Nën drejtimin e dirigjentit Orges Mema dhe me kujdesin e drejtores së shkollës Adriana Gjepali, orkestra, kori dhe solistët e shkollës sollën një udhëtim emocional përmes ekspozitës, këngëve dhe pjesëve instrumentale që nderojnë identitetin, historinë dhe shpirtin shqiptar.
Nxënësit dhe mësuesit u bënë bashkë duke krijuar atë energji të veçantë që vetëm muzika dhe arti mund ta sjellë. Interpretimet e tyre, plot pasion e profesionalizëm, u pritën me entuziazëm nga të pranishmit, të cilët përjetuan një mbrëmje që rikujtoi krenarinë kombëtare përmes artit.
Me këtë koncert dhe ekspozitë, shkolla “Jan Kukuzeli” jo vetëm çeli festimet e Nëntorit, por riafirmoi edhe një herë rolin e artit si gjuha më e bukur për të treguar dashurinë për atdheun.
©️zërionline
