Në mbledhjen e djeshme të Këshillit Bashkiak të Durrësit, në krah të njëri-tjetrit u panë sërish kryetari i PD-së së qytetit të Durrësit Ardian Muka dhe nënkryetari i saj, Dritan Burgija. Pavarësisht se të dy mbeten përfaqësues zyrtarë të PD-së në këshillin bashkiak, prania e Burgijas vjen në një moment tensioni të brendshëm, pasi ai i është bashkuar lëvizjes për ringritjen e Partisë Demokratike të iniciuar nga Ervin Salianji, Ilir Alimehmeti e të tjerë, një nismë që kreu i PDSh-së, Sali Berisha dhe krerët lokalë, e kanë kundërshtuar duke i quajtur bashkëbisedimet mes demokratëve “takime kafenesh”. Dy drejtuesit kryesorë të PD-së në Durrës krah për krah në sallën e KB-së janë dëshmi e kontrastit mes unitetit në parlamentin vendor dhe përçarjes së thelluar politike që po shoqëron aktualisht demokratët.
Në mbledhje pas një periudhe të gjatë mungese u shfaq edhe këshilltari tjetër i PD, Arlind Boshku, që mban funksionin e sekretarit të PD-së dhe eshte pozicionuar gjithashtu pro levizjes se re.
Kësaj lëvizjeje i është bashkuar dhe ish-deputeti demokrat Pëllumb Berisha, njëkohësisht nënkryetar në PD-në lokale, ish-kryetari i degës Luan Hoti, si dhe sekretari organizativ i degës Nikolin Radovani.
Ndërkaq tri pikat e rendit të ditës në Këshill Bashkiak u miratuan njëzëri nga të gjithë këshilltarët, të majtë e të djathtë.
©️zërionline
