Një shtetas shqiptar, rreth të 60-ave, ka ndërruar jetë mbrëmjen e së martës në spitalin Cattinara të Triestes, pas një ndërlikimi shëndetësor të rëndë që e kapi në mes të punës në portin industrial të qytetit.
Ngjarja ndodhi pranë zonës së ngarkim-shkarkimit në terminalin Scalo Legnami, ku viktima po kryente procedura rutinë. Sipas raportimeve të medias italiane TriestePrima, disa teknikë të portit i kishin dorëzuar dokumente, por kur shkuan ta kontaktonin përsëri, e gjetën të shtrirë pa ndjenja në kabinën e kamionit.
Shërbimi i emergjencës 118 u lajmërua menjëherë dhe filluan përpjekjet për ta nxjerrë nga kabina, një operacion i vështirësuar edhe nga statura fizike e të ndjerit. Pasi u nxor, u kryen manovrat e para të reanimacionit në vendngjarje, por gjendja e tij ishte kritike.
Pasi u intubua dhe u stabilizua në mënyrë të përkohshme, ai u transportua me urgjencë drejt spitalit Cattinara, ku, pavarësisht ndërhyrjes mjekësore, humbi jetën pak më vonë.
Viktima ishte lindur në vitin 1968 dhe ndodhej në Itali për punë. Autoritetet lokale nuk kanë bërë ende të ditur identitetin e plotë të tij, ndërkohë që komuniteti shqiptar në Trieste është tronditur nga lajmi.
©️zërionline
