Radha dhe pritja në urgjencat spitalore janë shpesh burim shqetësimi për qytetarët. Megjithatë, përparësia e shërbimit nuk përcaktohet nga rendi i mbërritjes, por nga gjendja shëndetësore e pacientit. Në urgjencë zbatohet sistemi i triazhit, një metodë vlerësimi që ndan pacientët sipas rrezikut për jetën dhe nevojës për ndërhyrje të menjëhershme.
Menjëherë pas paraqitjes në urgjencë, çdo pacient vlerësohet nga infermieri i triazhit. Ky vlerësim është i menjëhershëm dhe përcakton kodin përkatës, i cili tregon nivelin e urgjencës dhe kohën maksimale të pritjes për t’u vizituar nga mjeku.
Kodet e triazhit dhe koha e pritjes
- Kodi i bardhë (Jo urgjent)
Përdoret për raste që nuk paraqesin rrezik të menjëhershëm për shëndetin.
• Vlerësimi nga infermieri: i menjëhershëm
• Vlerësimi nga mjeku: brenda 120 minutash - Kodi jeshil (Më pak urgjent)
Për pacientë me shqetësime shëndetësore që kërkojnë ndihmë mjekësore, por pa rrezik të menjëhershëm.
• Vlerësimi nga infermieri: i menjëhershëm
• Vlerësimi nga mjeku: brenda 60 minutash - Kodi i verdhë (Urgjent)
I jepet rasteve që mund të përkeqësohen dhe kërkojnë ndërhyrje të shpejtë mjekësore. - Vlerësimi nga infermieri: i menjëhershëm
• Vlerësimi nga mjeku: brenda 30 minutash - Kodi i kuq (Emergjent)
Për raste kritike, ku jeta e pacientit është në rrezik të menjëhershëm.
• Vlerësimi nga infermieri: i menjëhershëm
• Vlerësimi nga mjeku: brenda 5 minutash
Pse është i rëndësishëm ky sistem
Triazhimi synon të sigurojë që pacientët në gjendje më të rëndë të marrin ndihmën e nevojshme sa më shpejt, duke shmangur vonesat që mund të rrezikojnë jetën. Njohja e këtyre kodeve ndihmon qytetarët të kuptojnë arsyen e pritjes dhe funksionimin e urgjencës spitalore.
Respektimi i sistemit të triazhit dhe informimi i qytetarëve mbi mënyrën e funksionimit të tij janë thelbësore për një shërbim urgjent më efikas dhe më të drejtë për të gjithë pacientët.
©️zërionline
