Nëndetësja e marinës turke TCG İNÖNÜ ndodhet në Portin e Durrësit për një vizitë treditore, në kuadër të bashkëpunimit ndërinstitucional dhe marrëdhënieve të konsoliduara mes forcave detare të vendeve aleate.
Prania e kësaj njësie ushtarake në një nga portet më të rëndësishme në rajon vjen në një moment kur çështjet e sigurisë detare dhe stabilitetit rajonal kanë marrë një rëndësi të veçantë në kontekstin e zhvillimeve dhe konflikteve që po shënojnë skenën ndërkombëtare.
Gjatë qëndrimit të nëndetëses në Durrës, autoriteti portual, në bashkëpunim me Forcën Detare dhe Policinë Ushtarake, kanë marrë masat e nevojshme organizative dhe të sigurisë për garantimin e kushteve të akomodimit dhe zhvillimin normal të kësaj vizite.
Vizita e nëndetëses turke konsiderohet një moment domethënës në kuadër të bashkëpunimit ushtarak dhe partneritetit strategjik mes vendeve aleate, duke reflektuar angazhimin për forcimin e sigurisë detare dhe koordinimin në një rajon që mbetet i rëndësishëm për stabilitetin në Mesdhe.
