Një 42-vjeçar, i shpallur në kërkim nga autoritetet italiane dhe i dënuar me mbi 5 vite burg për vjedhje me pasoja të rënda dhe emigracion të paligjshëm, është ndaluar nga Policia Kufitare në PKK Port, Durrës.
Sipas Policisë, gjatë kontrolleve dhe verifikimeve të detajuara në hyrje-dalje të territorit shqiptar, shërbimet kufitare konstatuan se një person që tentonte të hynte në Shqipëri përdorte disa identitete të ndryshme, me qëllim shmangien e identifikimit nga autoritetet ligjzbatuese.
Pas verifikimeve të kryera, u bë ndalimi me qëllim ekstradimi i shtetasit Armando Valchizan, i njohur edhe me disa identitete të tjera: Armando Dervishi, Armando Gheorghe, Altin Dervishi dhe Martin Dervishi, 42 vjeç.
Nga kontrolli në sistemet ndërkombëtare rezultoi se Gjykata e Pordenones në Itali e ka dënuar këtë shtetas me 5 vjet, 9 muaj dhe 5 ditë burgim për veprat penale “Vjedhja” me pasoja të rënda dhe emigracion i paligjshëm.
Aktualisht, Interpol Tirana po bashkëpunon me Interpol Romën për të përfunduar procedurat e ekstradimit të tij drejt Italisë, ku do të vuajë dënimin e dhënë nga drejtësia italiane.
Ndërkohë, materialet procedurale i janë referuar Prokurorisë së Durrësit për veprime të mëtejshme.
©️zërionline
