Universiteti “Aleksandër Moisiu” në Durrës ka shënuar një zhvillim të rëndësishëm në fushën e kërkimit shkencor, duke themeluar një revistë shkencore në nivel kombëtar, e cila tashmë është përfshirë në databazën ndërkombëtare Scopus, një nga platformat kryesore globale për indeksimin e publikimeve akademike.
Ky zhvillim pritet të ndikojë drejtpërdrejt në rritjen e cilësisë së kërkimit shkencor në vend, duke ofruar një hapësirë të re dhe të standardizuar për publikimin e studimeve nga studentët dhe pedagogët shqiptarë.
Rektori i universitetit, Shkëlqim Fortuzi, e cilësoi përfshirjen në Scopus si një arritje të rëndësishme për institucionin dhe për gjithë komunitetin akademik në Shqipëri. Sipas tij, një nga përfitimet kryesore është lehtësimi i aksesit në publikime shkencore cilësore.
“Deri tani, kërkuesve shkencorë u duhej të paguanin nga 1500 deri në 2000 euro për të publikuar artikuj në revista ndërkombëtare. Tashmë, kjo mundësi ofrohet pa kosto në universitetin tonë”, u shpreh Fortuzi gjatë një konference për shtyp.
Përfshirja e revistës në një databazë të njohur ndërkombëtarisht si Scopus rrit ndjeshëm dukshmërinë dhe besueshmërinë e kërkimeve të realizuara në UAMD, duke i dhënë atyre mundësinë të jenë pjesë e rrjetit global të shkencës dhe inovacionit.
Krijimi i kësaj reviste synon të nxisë kulturën e kërkimit shkencor në vend, të përmirësojë standardet akademike dhe të krijojë më shumë mundësi për bashkëpunime ndërkombëtare, duke forcuar rolin e universitetit në zhvillimin e dijes dhe inovacionit.
V.Q.
©️zërionline
