Durrësi humbi sot një nga figurat më të veçanta të tij. Në moshën 76-vjeçare është ndarë nga jeta Thoma Berberi, i konsideruar si një nga pionierët e aktiviteteve nënujore në Shqipëri. Lajmi u dha nga djali i tij në rrjetet sociale.
I njohur jo vetëm si zhytës i apasionuar, por edhe si ndërtues i mjeteve të para nënujore në vend, si batiskafi, siluri i parë dhe, në dekadën e fundit, roboti për filmime nënujore, Berberi ishte një emër i lidhur ngushtë me zhvillimin e eksplorimit të thellësive detare.
Me pasion dhe këmbëngulje, ai arriti të ndërtojë batiskafin e parë shqiptar, një arritje e rrallë për kohën dhe kushtet në të cilat u realizua. Në këtë sipërmarrje të vështirë, ai pati edhe mbështetjen e vëllezërve të tij, të cilët kontribuuan në realizimin e këtij projekti ambicioz.
Puna e tij nuk kaloi pa u vlerësuar edhe ndërkombëtarisht. Për ndërtimin e batiskafit, Berberi mori njohje nga eksploratori i njohur i thellësive, Jacques Piccard.
Falë këtij përkushtimi, u hodhën hapat e parë në dokumentimin e botës nënujore shqiptare, përfshirë edhe kërkime me vlerë në fushën e arkeologjisë nënujore.
Me ndarjen nga jeta të Thoma Berberit, Shqipëria humb një pionier dhe një pasionant të rrallë, ndërsa trashëgimia e tij mbetet një pikë referimi për brezat që vijojnë të eksplorojnë botën nënujore.
Ai do të përcillet nesër paradite për në banesën e fundit, në varrezat e vjetra të qytetit.
©️zërionline
