Qindra besimtarë iu bashkuan sot ritualit të “Udhës së Kryqit” në Laç, organizuar nga kleri katolik. Në mesazhin e tij, Arqipeshkvi i Dioqezës Tiranë-Durrës, Imzot Arjan Dodaj, kërkoi që të mos abuzohet me rritjen e çmimeve në emër të luftës.
Në një realitet të trazuar nga konfliktet globale dhe pasojat ekonomike që ndihen edhe në vendin tonë, besimtarët iu bashkuan ritualit të “Udhës së Kryqit”, si një nga momentet më domethënëse të besimit të krishterë.
Ceremonia u drejtua nga Arqipeshkvi i Dioqezës Tiranë-Durrës, Imzot Arjan Dodaj, dhe u zhvillua pranë Kishës së “Shna Ndout”, ku përmes 14 ndalesave u përkujtuan mundimet dhe sakrifica e Jezu Krishtit.
Në mesazhin e tij, Imzot Dodaj u ndal te vështirësitë ekonomike dhe rritja e çmimeve, duke bërë thirrje për përgjegjësi dhe ndershmëri. Ai theksoi se nuk duhet abuzuar me situatat e krijuara nga luftërat për përfitime të padrejta, ndërsa kujtoi se të mirat materiale janë një përgjegjësi që duhet administruar me drejtësi.
Arqipeshkvi ngriti gjithashtu shqetësimin për fenomenin e shpopullimit, duke e lidhur atë me humbjen e shpresës në shoqëri. Sipas tij, mungesa e besimit dhe e perspektivës po i shtyn gjithnjë e më shumë njerëzit të largohen, ndërsa theksoi se vetëm përmes besimit mund të gjendet forca për të përballuar sfidat e kohës.
Pas përfundimit të “Udhës së Kryqit”, ceremoniali fetar vijoi me meshën e shenjtë pranë Kishës së “Shna Ndout”, ku morën pjesë shumë besimtarë, duke e kthyer këtë ditë në një moment reflektimi, lutjeje dhe bashkimi shpirtëror.
©️zërionline
