Bordi i Transparencës ka vendosur një tjetër rritje të çmimeve të karburanteve në vend, duke reflektuar luhatjet e tregjeve ndërkombëtare. Në mbledhjen e datës 10 prill 2026, u miratuan çmimet e reja tavan për shitjen me pakicë dhe shumicë, të cilat hyjnë në fuqi që prej orës 18:00 të së njëjtës ditë.
Sipas vendimit, çmimi i naftës (gazoil) për konsumatorët do të jetë deri në 217 lekë për litër, duke shënuar një rritje me 7 lekë krahasuar me nivelin e mëparshëm. Ndërkohë, benzina do të shitet maksimalisht me 176 lekë për litër. Në tregun me shumicë, nafta do të tregtohet deri në 205 lekë/litër, ndërsa benzina deri në 164 lekë/litër.
Autoritetet paralajmërojnë të gjithë operatorët e tregtimit të karburanteve për zbatimin e detyrueshëm të këtij vendimi, duke theksuar se çdo shkelje do të pasohet me masa të forta, deri në pezullim aktiviteti.
Nga ana tjetër, institucionet përgjegjëse deklarojnë se janë të angazhuara për mbrojtjen e interesave të konsumatorëve dhe garantimin e konkurrencës së ndershme në treg, megjithatë rritja e vazhdueshme e çmimeve vijon të ndikojë drejtpërdrejt në buxhetin e qytetarëve.
Në sqarimin zyrtar, bëhet e ditur se çmimet aktuale mbeten nën kufirin e përcaktuar nga akti normativ për akcizën. Kjo do të thotë se për karburantet do të vijojë të aplikohet niveli i plotë i akcizës, pra 100%, duke mos sjellë asnjë lehtësim fiskal për konsumatorët në këtë fazë.
©️zërionline
