NASA ka publikuar mëngjesin e sotëm fotografitë dhe videot që tregojnë uljen historike të ekuipazhit të Artemis II në Tokë.
“Ky është fillimi i një epoke të re të eksplorimit të hapësirës nga njeriu”, thotë NASA, pas kthimit të ekuipazhit.
Programi hënor Artemis i NASA-s ndërkaq u përball me rritje të konsiderueshme kostosh.
Katër vite më parë, agjencia vlerësonte se shpenzimet për periudhën 2012–2025 do të arrinin në rreth 93 miliardë dollarë, por auditimet e fundit tregojnë se këto kosto janë rritur më tej.
Megjithëse programi u shpall zyrtarisht në vitin 2017, zhvillimi i raketës kishte nisur vite më parë. Ndërkohë, përfitimet ekonomike nga shfrytëzimi i burimeve në Hënë mbeten ende afatgjata dhe të pasigurta.
Sipas NASA-s, programi aktual sjell ndikim të rëndësishëm në ekonominë amerikane, duke mbështetur rreth 20,000 vende pune dhe duke gjeneruar rreth 75.6 miliardë dollarë aktivitet ekonomik.
Një tjetër argument në favor të programit është konkurrenca ndërkombëtare. Në një seancë dëgjimore të vitit 2024, Frank Lucas theksoi se SHBA-të nuk janë vendi i vetëm që synon kthimin në Hënë, duke përmendur ambicien e Partisë Komuniste Kineze për të dërguar astronautë në sipërfaqen hënore deri në vitin 2030.
Sipas tij, vendi që do të arrijë i pari në Hënë do të ketë mundësinë të vendosë standardet për mënyrën se si do të zhvillohen aktivitetet e ardhshme atje qoftë me transparencë, apo në mënyrë më të kufizuar.
©️zërionline
