Një ngjarje e rëndë e ndodhur në Durrës, që fillimisht u dyshua si vdekje për shkaqe natyrale, është zbardhur nga Policia pas hetimeve intensive, duke çuar në arrestimin e një 42-vjeçari.
Sipas burimeve zyrtare, specialistët për hetimin e krimeve ndaj personit në Drejtorinë Vendore të Policisë Durrës nisën verifikimet pas humbjes së jetës së shtetasit Sajmir Markja, 59 vjeç, për të cilin paraprakisht u raportua se kishte ndërruar jetë si pasojë e një arresti kardiak.
Por, nga tërësia e veprimeve hetimore të kryera nën drejtimin e Prokurorisë, rezultoi se ngjarja kishte një tjetër dinamikë. Më datë 13 prill 2026, në lagjen nr. 18 të qytetit, 42-vjeçari Gentian Kraja është konfliktuar me 59-vjeçarin për motive të dobëta. Gjatë përplasjes, ai e ka goditur me grushte, duke bërë që viktima të humbasë ndjenjat dhe të rrëzohet në asfalt.
Si pasojë e rënies dhe dëmtimeve të marra, 59-vjeçari ka humbur jetën.
Në përfundim të veprimeve hetimore, Policia ka ndaluar shtetasin Gentian Kraja, 42 vjeç, banues në lagjen nr. 18, Durrës, i dyshuar për veprën penale “Vrasja nga pakujdesia”.
Ndërkohë, nën drejtimin e Prokurorisë së Durrësit vijon puna për dokumentimin e plotë ligjor të kësaj ngjarjeje, ndërsa materialet procedurale i janë referuar organit të akuzës për veprime të mëtejshme.
©️zërionline
