Një konflikt i dhunshëm është regjistruar mëngjesin e sotëm tek Pazari i Vjetër i Korçës, ku tre persona kanë mbetur të plagosur pas një sherri që degradoi në përdorimin e mjeteve të forta dhe thikës.
Sipas informacioneve paraprake, në konflikt janë përfshirë dy pronarë lokalesh dhe vëllezërit e tyre. Fillimisht, përplasja ka nisur si debat verbal mes tyre, por situata është përshkallëzuar shpejt në dhunë fizike.
Në sherr e sipër, njëri prej të përfshirëve dyshohet se ka marrë një thikë duke plagosur një nga personat e tjerë, duke e goditur në këmbë. Dy të dëmtuarit e tjerë kanë pësuar dëmtime të lehta si pasojë e goditjeve gjatë konfliktit.
Tre personat me dëmtime u transportuan menjëherë për ndihmë mjekësore në Spitali Rajonal të Korçës, ku ndodhen jashtë rrezikut për jetën.
Shkaqet e konfliktit mbeten ende të paqarta, ndërsa grupi hetimor po punon për zbardhjen e plotë të rrethanave.
©️zërionline
