Drejtoria e Përgjithshme e Doganave ka reaguar lidhur me zhdukjen dhe rikthimin e një kontenieri me mallra të dyshuara në Porti i Durrësit.
Sipas sqarimit zyrtar, strukturat doganore, në bashkëpunim me Grupin e Antikontrabandës, ushtruan kontroll mbi një kontenier në tranzit, ku u konstatuan mallra që dyshohen se cenojnë të drejtat e pronësisë intelektuale. Në zbatim të ligjit, mallrat (atlete, pantallona dhe kufje) u bllokuan në pritje të verifikimit përfundimtar.
Për shkak të mungesës së hapësirës magazinuese, mallrat u depozituan në një kontenier bosh, i cili u plumbos dhe u vendos në Zonën e Monitorimit. Në të njëjtin kontenier u shtuan më pas edhe dy raste të tjera mallrash të bllokuara me të njëjtin dyshim.
Por më 9 prill 2026, gjatë një kontrolli të radhës, u konstatua se kontenieri nuk ndodhej më në vendin e caktuar. Nga verifikimet rezultoi se ai ishte imbarkuar më herët, më 2 prill, si kontenier bosh në një anije drejt jashtë vendit.
Menjëherë pas zbulimit të rastit, autoritetet nisën hetimin procedural dhe kontaktuan me operatorët portualë dhe agjencinë detare përkatëse.
Sipas Doganave, kontenieri është kthyer tashmë në Durrës dhe nga verifikimet paraprake rezulton se plumbosja nuk është dëmtuar. Ai pritet të hapet në prani të strukturave të Hetimit Doganor dhe Prokurorisë së Durrësit për të verifikuar gjendjen dhe sasinë e mallrave.
Drejtoria e Përgjithshme e Doganave thekson se është e angazhuar për zbardhjen e plotë të ngjarjes, ndërsa paralajmëron se, përveç hetimit penal, do të vlerësohen edhe përgjegjësitë disiplinore të punonjësve të përfshirë.
©️zërionline
