Një tjetër apartament i marrë me qira në Durrës është kthyer në skenë të një rrjeti prostitucioni që funksiononte prej javësh, deri në ndërhyrjen e policisë.
Operacioni i koduar “Storm 18”, i zhvilluar pas një hetimi njëmujor me metoda speciale, çoi në prangosjen e organizatores së dyshuar, një shtetase kolumbiane 26 vjeçe, e cila jo vetëm menaxhonte aktivitetin, por dyshohet se ushtronte edhe vetë prostitucion. Së bashku me të, në flagrancë u arrestuan edhe dy shtetase të tjera kolumbiane, të përfshira në këtë veprimtari.
Sipas burimeve policore, ambienti në lagjen nr. 1 ishte përshtatur posaçërisht për këtë qëllim, duke funksionuar si bazë e mirëorganizuar për ushtrimin e prostitucionit. Ndërkohë, tre persona të tjerë, klientë, janë proceduar penalisht në gjendje të lirë.
Gjatë operacionit u sekuestruan prova të rëndësishme, përfshirë pasaportat e të arrestuarave, një shumë parash e dyshuar si e përfituar nga prostitucioni, një leje drejtimi dhe tre telefona celularë.
Materialet i janë referuar tashmë Prokurorisë pranë Gjykatës së Shkallës së Parë në Durrës, ndërsa hetimet pritet të zbardhin më tej shtrirjen dhe lidhjet e mundshme të këtij aktiviteti.
©️zërionline
