Specialistët për Hetimin e Krimeve Ekonomike Financiare kanë ekzekutuar masën e sigurisë “Arrest me burg” për shtetasin Petrit Qosja, 55 vjeç, banues në Elbasan. Masa ishte caktuar nga Gjykata e Durrësit, në kuadër të operacionit “Eko-Toxic”, që lidhet me veprën penale “Menaxhimi i mbetjeve”, e kryer në bashkëpunim.
Ekzekutimi i vendimit u realizua në ambientet e Spitalit të Elbasanit, për shkak të gjendjes shëndetësore të të arrestuarit.
Çështja në fjalë lidhet me një nga hetimet më të bujshme të muajve të fundit, ku Prokuroria e Durrësit lëshoi dhjetëra urdhër-arreste në fillim të shkurtit. Hetimet kanë në fokus 2800 ton mbetje toksike të kompanisë “Kurum”, të cilat dyshohet se u tentuan të eksportoheshin drejt Tajlandës por u kthyen në Durrës pas alarmit të dhënë nga Rrjeti i Bazelit dhe Olaf.
Petrit Qosja është nën hetim në cilësinë e tregtarit të mbetjeve dhe përfshirjen e tij në transportin ndërkombëtar të këtyre materialeve, të cilat dyshohet se do të trajtoheshin përmes marrëveshjeve me qira.
Autoritetet vijojnë hetimet për skemën dhe rolin e secilit prej personave të përfshirë në këtë rast që ngre shqetësime serioze për sigurinë mjedisore dhe ligjshmërinë e menaxhimit të mbetjeve në vend.
©️zërionline
