Policia e Tiranës vijon hetimet për identifikimin e autorëve të grabitjes së një argjendarie në Kamëz, ngjarje e ndodhur mesditën e së shtunës.
Sipas burimeve hetimore, kamerat e sigurisë kanë zbuluar itinerarin e lëvizjes së autorëve pas grabitjes. Ata dyshohet se janë larguar menjëherë nga vendi i ngjarjes në drejtim të Zallherrit, duke udhëtuar me motor dhe të maskuar gjatë gjithë kohës.
Gjatë arratisjes, autorët kanë rrëshqitur dhe janë rrëzuar me motor, por më pas kanë arritur të largohen sërish.
Hetuesit bëjnë me dije se grabitësit mbanin në duar bizhuteritë e marra nga argjendaria, si edhe një armë që dukej si kallashnikov, ndërsa ishin të pajisur me skafandra për të fshehur identitetin.
Pas ngjarjes, policia ka shoqëruar disa persona me precedentë penalë në zonë, për të verifikuar nëse kanë lidhje me grabitjen. Megjithatë, deri tani autorët nuk janë identifikuar.
Nga këqyrja e vendngjarjes rezulton se janë marrë sende ari dhe argjendi, ndërsa grupi hetimor po analizon provat dhe pamjet filmike të siguruara.
Në pyetje është marrë edhe punonjësja e argjendarisë, e cila ka deklaruar se në momentin e grabitjes ndodhej në pjesën e pasme të dyqanit dhe nuk është përballur me autorët.
“Më datë 16.05.2026, rreth orës 13:00, në Kamëz, dy shtetas ende të paidentifikuar, dyshohet se njëri prej tyre me një send në dukje armë zjarri, kanë hyrë në ambientet e argjendarisë në pronësi të shtetasit O. L, dhe kanë marrë një sasi bizhuterish.
Menjëherë pas marrjes së njoftimit, në vendngjarje kanë shkuar shërbimet e Policisë, të cilat kanë ngritur pika kontrolli dhe po kryejnë kontrolle të zonës.
Grupi hetimor, po punon për fiksimin e çdo prove që do të çojë në identifikimin e autorëve dhe kapjen e tyre dhe dokumentimin e plotë të rastit”, thuhet në njoftimin e policisë.
©ZëriOnline
