Aksi rrugor Gramsh–Kukur vijon të jetë i pakalueshëm pas reshjeve të dendura që shkaktuan rrëshqitje dherash dhe dëmtime të mëdha në rrugë.
Në zonën e njohur si “Përroi i Pishave”, një kamion i ngarkuar me mallra ushqimore ka mbetur i bllokuar prej më shumë se shtatë orësh, ndërsa situata konsiderohet e rrezikshme për shkak të pozicionit të mjetit pranë skajit të rrugës së dëmtuar.
Kamioni, që po furnizonte dyqanet e njësisë administrative Kukur, rrezikon të rrëshqasë në humnerë. Përballë mungesës së ndërhyrjes nga institucionet përgjegjëse, banorët e zonës kanë marrë vetë situatën në dorë, duke përdorur mjete rrethanore dhe automjete terreni për të stabilizuar mjetin.
Sipas banorëve, pavarësisht rrezikut dhe izolimit të krijuar në zonë, deri tani nuk ka pasur asnjë reagim nga autoritetet rrugore për hapjen e aksit apo sigurimin e segmentit problematik.
Pamjet nga vendngjarja tregojnë gjendjen e rënduar të rrugës dhe vështirësitë me të cilat përballen banorët sa herë ka reshje intensive. Aksi Gramsh–Kukur prej kohësh konsiderohet një nga segmentet më problematike në zonë për shkak të dëmtimeve të shpeshta infrastrukturore.
Deri më tani nuk raportohet për persona të lënduar, ndërsa përpjekjet për nxjerrjen e kamionit vazhdojnë.
©ZëriOnline
