Një shqiptar i akuzuar për 33 vjedhje me thyerje në Austri është dënuar me tre vite e gjysmë burg, ndërsa mediat austriake e kanë përshkruar si “personazhin tipik të një hajduti të krijuar nga inteligjenca artificiale”.
Sipas gazetës austriake Kleine Zeitung, shqiptari vepronte së bashku me një tjetër person në disa rajone të Austrisë, duke hyrë në banesa përmes metodës së shpimit të izolimit të derës.
Nga hetimet rezulton se dyshja realizoi me sukses dhjetëra grabitje në Karinthi, Stiri dhe Burgenland, ndërsa dëmi i shkaktuar llogaritet në mbi 327 mijë euro.
Hetuesit zbuluan se autorët merrnin kryesisht para cash dhe koleksione monedhash, ndërsa pajisjet elektronike i linin në vendngjarje.
Në gjykatë, shqiptari i pranoi në mënyrë të përgjithshme vjedhjet, duke deklaruar se nuk mbante mend detaje, pasi episodet ishin të shumta. Pas një reflektimi të shkurtër, ai pranoi edhe dënimin me 3 vite e gjysmë burg.
©ZëriOnline
