Një përplasje me armë zjarri mes një shqiptari dhe policisë në orët e para të mëngjesit të sotëm tronditi zonën e Mikrolimanos në Greqi. Bëhet me dije se i plagosur mbeti shqiptari Astrit Hasani, i njohur ndryshe me nofkën “Titi”.
Ngjarja ndodhi pak para orës 05:00, kur oficerët e policisë greke, gjatë një patrullimi rutinë, i kërkuan 42-vjeçarit Hasani të ndalonte për kontroll. Sipas autoriteteve, ai tentoi të largohej dhe më pas nxori armën duke e drejtuar ndaj efektivëve.
“Oficerët e policisë reaguan menjëherë sapo shqiptari drejtoi armën, duke u pozicionuar përpara se të qëllonin”, deklaroi zëdhënësja e Policisë Helenike, Constantia Dimoglidou.
Pas ndërhyrjes së policisë, Hasani u plagos dhe u transportua me ambulancë në Spitalin Attikon, ndërsa raportohet se ndodhet jashtë rrezikut për jetën.
Gjatë kontrolli, nuk u gjet asnjë mjet identifikimi i shqiptarit, ndërsa policia greke zbuloi një arsenal armësh në posedim të tij. Autoritetet sekuestruan dy pistoleta, një revolver dhe një çantë me gjashtë granata, e cila u gjet pranë vendit të ngjarjes. Zona u rrethua menjëherë, ndërsa ekspertët e antieksplozivit kryen kontrolle për neutralizimin e municioneve.
Sipas mediave greke, Astrit Hasani dyshohet të ketë lidhje me persona të botës së krimit dhe jetës së natës në Greqi. Hetuesit po verifikojnë gjithashtu përfshirjen e tij në incidente të mëparshme me armë, ndërsa Drejtoria e Krimit të Organizuar ka marrë nën hetim çështjen.
©ZëriOnline
