Besimtarët myslimanë festojnë sot Kurban Bajramin, festën e madhe që simbolizon sakrificën, dashurinë, solidaritetin dhe devotshmërinë e njeriut ndaj Zotit.
Që në orët e para të mëngjesit, me qindra besimtarë të qytetit bregdetar të Durrësit, ashtu si në mbarë vendin, iu drejtuan Xhamisë së Madhe në qendër, për faljen e namazit dhe për të ndarë këtë moment gëzimi të përbashkët me njëri-tjetrin.
Gjatë ligjëratës së mbajtur përpara besimtarëve, imamët Eduard Shekfkiu dhe Ervin Qylafku u ndalën gjatë te kuptimi i kësaj feste, duke e vendosur theksin te sakrifica si një kusht jetik për mbarëvajtjen dhe ngritjen e një shoqërie në nivele më të larta morale e sociale.
Sipas hoxhë Qylafkut, ky parim kërkon angazhimin e secilit individ, por edhe të strukturave, institucioneve që drejtojnë vendin.
“Ashtu si individi duhet të sakrifikojë nga koha, gjumi dhe të ardhurat e tij për të ofruar më të mirën, ashtu edhe institucionet duhet të bëjnë të njëjtën gjë në shërbim të qytetarëve, si rruga e vetme për të arritur një standard të lartë ndërgjegjeje dhe normash morale që garantojnë përparimin dhe harmoninë kolektive”, u theksua gjatë ligjërimit.
Pas përfundimit të ceremonisë së faljes, besimtarët shkëmbyen urimet e ngrohta tradicionale, për të vijuar më tej festën pranë vatrave të tyre familjare, duke përcjellë mesazhin e paqes, humanizmit dhe solidaritetit te të afërmit dhe njerëzit në nevojë.
Gëzuar Kurban Bajramin të gjithë besimtarëve!
©ZëriOnline
