Zona përreth ish-Kombinatit Metalurgjik në Elbasan po përballet me një situatë të rëndë mjedisore, e cila sipas banorëve po përkeqësohet nga dita në ditë.
Shtëllunga të dendura tymi kanë mbuluar një pjesë të konsiderueshme të territorit, duke shkaktuar ndotje të lartë të ajrit dhe shqetësime serioze për shëndetin e komunitetit. Pamjet e siguruara nga zona tregojnë qartë përmasat e problemit, ndërsa banorët kërkojnë ndërhyrje urgjente nga institucionet përgjegjëse.
Sipas dëshmive të banorëve të zonës dhe fshatrave përreth, prej disa ditësh ata janë detyruar të përballen me një erë të rëndë dhe mbytëse, e cila dyshohet se vjen nga djegia e gomave dhe mbetjeve të tjera të rrezikshme.
“Është e pamundur të mbash dritaret hapur. Era është e padurueshme dhe tymi mbulon gjithë zonën”, shprehen të shqetësuar banorët, të cilët ngrejnë alarmin për pasojat që kjo ndotje mund të ketë në shëndetin e tyre, veçanërisht te fëmijët dhe të moshuarit.
Banorët kërkojnë verifikimin e menjëhershëm të situatës dhe marrjen e masave konkrete për ndalimin e ndotjes, ndërsa presin reagim nga autoritetet mjedisore dhe institucionet vendore.
©ZëriOnline
