Galeria e arteve figurative “Nikolet Vasia” në Durrës hapi dyert për një ekspozitë të veçantë kushtuar një prej emrave të artit figurativ shqiptar, piktorit dhe ilustratorit Agim Faja. E organizuar në kuadër të 1 Qershorit, Ditës Ndërkombëtare të Fëmijëve, ekspozita sjell para publikut një pjesë të rëndësishme të krijimtarisë së artistit, i cili për dekada me radhë i dha ngjyra imagjinatës së brezave të tërë shqiptarë.
Mes veprave të ekspozuara spikatën ilustrimet që kanë shoqëruar libra të njohur për fëmijë, tekste shkollore dhe botime artistike, duke rikthyer kujtime të hershme për shumë vizitorë. Një nga imazhet më përfaqësuese të ekspozitës ishte kopertina e librit “E vogla Ani dhe Tritani” (1977), një vepër e njohur për disa breza lexuesish, e realizuar nga Faja.
Artistë, dashamirës të artit dhe qytetarë të Durrësit u bënë pjesë e ceremonisë së hapjes, duke e kthyer ekspozitën në një homazh për një figurë që ka lënë gjurmë të rëndësishme në kulturën shqiptare. Punimet e ekspozuara dëshmojnë jo vetëm mjeshtërinë artistike të Fajës, por edhe aftësinë e tij për të komunikuar me botën e fëmijëve përmes një gjuhe figurative të pasur, plot ndjeshmëri dhe fantazi.
I lindur në Eminas të Shijakut më 14 mars 1939, Agim Faja ishte piktor, ilustrator dhe pedagog, i cili ia kushtoi jetën artit dhe edukimit estetik. Gjatë karrierës së tij realizoi qindra ilustrime, bashkëpunoi në dhjetëra botime dhe mori pjesë në ekspozita brenda dhe jashtë vendit. Krijimtaria e tij mbetet një pasuri e çmuar e artit figurativ shqiptar, ndërsa veprat e tij pasqyrojnë jetën, traditat dhe identitetin kulturor të trevës së Shijakut dhe më gjerë.
Mbresëlënëse për vizitorët ishin jo vetëm vlerat artistike të veprave, por edhe dimensioni emocional që ato mbartin. Për shumë prej tyre, ilustrimet e Agim Fajës përfaqësojnë një pjesë të pandashme të kujtesës së fëmijërisë, duke dëshmuar ndikimin e jashtëzakonshëm që artisti pati në formimin kulturor të disa brezave.
Një rol të rëndësishëm në ruajtjen dhe promovimin e trashëgimisë së tij kanë luajtur djemtë e artistit, Ergys dhe Ardit Faja, të cilët kanë sjellë vazhdimisht pranë publikut krijimtarinë e të atit, duke e bërë atë pjesë të jetës kulturore edhe pas ndarjes së tij nga jeta në vitin 2017.
Ekspozita e çelur në Galerinë “Nikolet Vasia” vjen si një vlerësim i merituar për një prej figurave më të spikatura të ilustrimit shqiptar, një artist që me penelin e tij krijoi një univers të tërë ngjyrash, personazhesh dhe emocionesh, të cilat vijojnë të jetojnë në kujtesën e lexuesve dhe artdashësve.
©ZëriOnline
