Një aksident i rëndë rrugor është regjistruar mëngjesin e sotëm, rreth orës 07:00, në aksin Vlorë-Orikum, në zonën e Radhimës, duke shkaktuar humbjen e jetës së një personi dhe plagosjen e disa të tjerëve.
Sipas të dhënave paraprake, automjeti tip “Benz”, i drejtuar nga shtetasi V.R., i cili po lëvizte në drejtimin Vlorë-Orikum, është përplasur me automjetin tip “BMW”, që drejtohej nga shtetasi i identifikuar si Flamur Kabello, dhe që po qarkullonte në drejtimin e kundërt, Orikum-Vlorë.
Si pasojë e përplasjes së fortë, drejtuesi i mjetit BMW, shtetasi F.Kabello, ka humbur jetën në vendngjarje. Ndërkohë, pesë pasagjerët e automjetit “Benz”, shtetas egjiptianë kanë pësuar dëmtime të lehta dhe janë transportuar në spital për të marrë ndihmën e nevojshme mjekësore.
Në aksident është përfshirë edhe një automjet “Seat”, drejtuesi i të cilit nuk ka pësuar dëmtime.
Pak minuta pas përplasjes, automjetet e përfshira në aksident janë përfshirë nga flakët, duke e bërë edhe më të rëndë situatën në vendngjarje.
Nga këqyrja paraprake dhe veprimet e para hetimore, dyshohet se shkak i aksidentit ka qenë një parakalim i gabuar dhe dalja në anën tjetër të karrexhatës nga ana e automjetit “Benz”, si dhe shpejtësia e lartë.
Shërbimet e Policisë dhe grupi hetimor ndodhen në vendngjarje dhe po punojnë për zbardhjen e plotë të rrethanave dhe dinamikës së kësaj ngjarjeje të rëndë.
©ZëriOnline
