Thirrje për dorëheqjen e kryebashkiakes Emiriana Sako dhe sërish kundërshtim i fortë ndaj projektit TID. Banorët e prekur nga plani urbanistik janë mbledhur sërish në protestë para Bashkisë së Durrësit, duke kërkuar anulimin e pjesës së projektit që, sipas tyre, rrezikon banesat dhe pronat e tyre. Protesta u zhvillua para dhe gjatë mbledhjes së Këshillit Bashkiak, ndërsa protestuesit paralajmëruan se nuk do të ndalen derisa të marrin përgjigje për kërkesat e tyre.
Me pankarta në duar dhe thirrje të forta kundër projektit, protestuesit deklaruan se ndërhyrja urbanistike cenon pronat e tyre dhe rrezikon shembjen e banesave ekzistuese, duke e cilësuar procesin të padrejtë dhe arbitrar.
Kritikat e protestuesve u drejtuan ndaj institucioneve qendrore dhe vendore, duke vënë në shënjestër kryebashkiaken e Durrësit, Emiriana Sako, kryeministrin Edi Rama, ish-zëvendëskryeministren Belinda Balluku dhe ministren Mirela Kumbaro, të cilët i konsiderojnë përgjegjës për vijimin e projektit pavarësisht kundërshtimeve të banorëve. Ata kërkuan gjithashtu dorëheqjen e Sako-s nëse nuk ndërmerren hapa për anulimin e pjesëve të projektit që prekin zonën e tyre.
Banorët ngritën gjithashtu shqetësimin për favorizim të disa banorëve, si familjarë të Spartak Kovacit në dëm të të tjerëve, si dhe për vlerat e ulëta të shpronësimeve që u janë ofruar. Sipas tyre, çmimet nuk përputhen me tregun aktual të pasurive të paluajtshme, ndërsa prej muajsh jetojnë me pasiguri për fatin e pronës dhe të ardhmen e familjeve të tyre.
Banorët deklaruan se do të vijojnë protestat dhe betejën ligjore kundër projektit deri në rishikimin e tij dhe garantimin e të drejtave të tyre.
©ZëriOnline
