Një tragjedi tronditi këtë të premte bregdetin e Adriatikut në zonën e Tales në Lezhë, ku dy vajza të mitura, vetëm 11 dhe 9 vjeçe, humbën jetën. Dyshohet se janë mbytur dhe se kanë qenë të pashoqëruara.
Sipas të dhënave paraprake, dy të miturat ndodheshin në plazh publik kur, në rrethana ende të paqarta, u përfshinë nga dallgët pa mundur të dalin në breg.
Sipas policisë vendore, rreth orës 12:50, në plazhin e Tales, dy shtetaset e mitura, të moshave 9 dhe 11 vjeçe, dyshohet se janë mbytur duke u larë në det.
Shërbimet e Policisë Kufitare dhe të DVP Lezhë kanë shkuar menjëherë në vendngjarje.
Në bashkëpunim me pushuesit, është bërë e mundur gjetja dhe nxjerrja e trupave të pajetë në breg.
Grupi hetimor ndodhet në vendngjarje dhe, nën drejtimin e Prokurorisë, vijon puna për zbardhjen e rrethanave të rastit.
Trupat u dërguan në morgun e spitalit të Lezhës, ndërsa thirrja për kujdes të shtuar ndaj fëmijëve në plazhe nuk është e tepërt asnjëherë, jo vetëm për prindërit, po dhe të rriturit që frekuentojnë plazhet dhe duhet të japin sa më shpejt ndihmën e parë.
©ZëriOnline
