Mosmarrja e bonusit të qerasë, që mbulohet 50 % nga bashkia, prej nëntë muajsh ka nxjerrë në protestë përfaqësues të komunitetit rom dhe egjiptian në Durrës. Ata u mblodhën paraditen e sotme para bashkisë dhe qëndruan aty për disa orë, duke kërkuar zgjidhje për vonesat e pagesave që, sipas tyre, po i vendosin familjet në vështirësi ekonomike dhe sociale.
Pas tensioneve të krijuara në sheshin para institucionit vendor, ku protestuesit u shfaqën me gurë në duar, një përfaqësi e banorëve u prit në bashki për të diskutuar rastin.
Sipas Ismail Jakupit, përfaqësues i protestuesve në takim dhe drejtues i shoqatës “Ushten”, vonesat janë shkaktuar nga procesi i verifikimit të dokumentacionit, si dhe nga moskalimi i fondeve përkatëse nga Ministria e Financave.
Në listën e përfituesve të bonusit të strehimit, që mbulon 50% të qirasë, janë rreth 90 familje të komuniteteve rome dhe egjiptiane që akuzojnë bashkinë për diskriminim. Në total, skema përfshin 412 përfitues. Bashkia ka bërë të ditur se pagesat pritet të kryhen nga sot e në ditët në vijim edhe për familjet e tjera përfituese, të cilave do t’u kalojnë njëherësh 5 muaj pagesë.
©ZëriOnline
