Një punonjës i Policisë së Burgjeve në IEVP Durrës është kapur në flagrancë teksa tentonte t’i fuste një të paraburgosuri lëndë të dyshuar narkotike. Rasti u zbulua pas kontrolleve dhe verifikimeve të kryera nga Drejtoria e Përgjithshme e Burgjeve, në bashkëpunim me Agjencinë e Mbikëqyrjes në Sistemin e Ekzekutimit të Vendimeve Penale.
Sipas burimeve zyrtare, punonjësi ishte evidentuar më herët në analizat e riskut si person me prirje për përfshirje në veprimtari të paligjshme. Pas sigurimit të informacionit operativ, autoritetet organizuan kontrollin që çoi në kapjen e tij në momentin e tentativës për të futur lëndën e dyshuar narkotike. Gjatë kontrollit fizik, atij iu gjet edhe një sasi tjetër e dyshuar me lëndë narkotike.
Menjëherë pas zbulimit të rastit, punonjësi u pezullua nga detyra, ndërsa kanë nisur procedurat hetimore për zbardhjen e plotë të ngjarjes.
Ndërkohë, një tjetër goditje ndaj sendeve të ndaluara në burgje është shënuar edhe në IEVP Fier. Gjatë kontrolleve të ushtruara në ambientet e paraburgimit, u gjetën dhe u sekuestruan dy telefona celularë dhe një fishë karikimi, pa u identifikuar ende personat përgjegjës për futjen e tyre.
Drejtoria e Përgjithshme e Burgjeve bëri të ditur se të dyja rastet po ndiqen në bashkëpunim me strukturat përgjegjëse, ndërsa kontrollet dhe masat për rritjen e sigurisë në institucionet e vuajtjes së dënimit do të vijojnë.
©ZëriOnline
