Para se flakët të viheshin nën kontroll, një zjarr me përmasa të mëdha përfshiu pasditen e së enjtes një magazinë ku ruheshin materiale plastike dhe piroteknike, mes tyre lodra për fëmijë dhe fishekzjarrë, pranë mbikalimit të Shkozetit në Durrës.
Gjatë operacionit për shuarjen e zjarrit, dy efektivë të Shërbimit të Mbrojtjes nga Zjarri dhe Shpëtimit, Nadir Kapaj dhe Maliq Gjyli, pësuan asfiksi nga tymi dhe u transportuan në Spitalin Rajonal të Durrësit. Ata po marrin ndihmën e nevojshme mjekësore dhe, sipas burimeve zyrtare, gjendja e tyre shëndetësore është e qëndrueshme.
Operacioni i ndërhyrjes zgjati më shumë se tre orë. Në terren u angazhuan 24 efektivë të Shërbimit të Mbrojtjes nga Zjarri dhe Shpëtimit të Bashkisë Durrës, me 5 mjete zjarrfikëse, 4 autobotë dhe 1 autoshkallë. Në operacion morën pjesë edhe forcat zjarrfikëse të Portit të Durrësit, si dhe stacioni i MZSH-së Shijak.
Sipas Bashkisë Durrës, falë ndërhyrjes së shpejtë dhe koordinimit të strukturave të angazhuara, flakët janë vënë nën kontroll. Aktualisht vijon puna për shuarjen e plotë të vatrave të mbetura dhe sigurimin e perimetrit, ndërsa nuk raportohet rrezik për përhapjen e zjarrit drejt objekteve përreth.
Për shkak të incidentit, policia bllokoi qarkullimin e automjeteve në Unazën e Durrësit, pranë mbikalimit të Shkozetit, në segmentin rrugor “Martin Camaj” në drejtim të Plepave, si dhe në aksin Durrës-Kavajë. Për arsye sigurie, gjatë operacionit u ndërpre gjithashtu energjia elektrike në zonë për më shumë se një orë.
Shkaqet e rënies së zjarrit mbeten ende të paqarta. Ato pritet të përcaktohen pas përfundimit të hetimeve nga grupi hetimor.
©ZëriOnline
