Një sherr i dhunshëm me sende të forta mes disa personave ka ndodhur pas mesnate në qytetin e Tepelenës, duke lënë të plagosur tre persona.
Raportohet se, ngjarja u regjistrua rreth orës 01:00 pranë një lokali lloto, ku disa prej personave të përfshirë në konflikt ndodheshin në ambientet e tij. Sipas informacioneve paraprake, grupi tjetër ka mbërritur në vendngjarje me tre automjete tip fuoristradë, ndërsa debati është përshkallëzuar në përplasje fizike me përdorimin e shkopinjve të bejsbollit, mjeteve të forta dhe armëve të ftohta.
Si pasojë e konfliktit, dy vëllezër dhe kushëriri i tyre mbetën të plagosur. Ata u transportuan me urgjencë në Spitalin Rajonal të Gjirokastrës dhe ndodhen jashtë rrezikut për jetën.
Sipas raportimeve, bëhet me dije se konflikti kishte nisur që gjatë orëve të paradites, por u rikthye me intensitet më të madh pas mesnate.Ndërkohë, policia ka shpallur në kërkim autorët e dyshuar dhe po vijon hetimet për zbardhjen e plotë të rrethanave të ngjarjes. Mbetet ende e paqartë nëse efektivët kishin dijeni për konfliktin e mëparshëm dhe nëse ishin marrë masa për të parandaluar përshkallëzimin e tij.
©ZëriOnline
