FIFA dhe presidenti i saj, Gianni Infantino, kanë hequr dorë nga plani për shitjen e një pjese të aksioneve dhe administrimit të eventeve më të rëndësishme të organizatës, pas kundërshtimit të fortë nga federatat kryesore të futbollit në botë.
Në një deklaratë të publikuar të premten në mbrëmje, Infantino tha se, pas konsultimeve me palët e interesuara, ishte bërë e qartë se nisma kishte krijuar përçarje dhe nuk i shërbente më objektivit fillestar.
“Qëllimi ynë ka qenë gjithmonë dhe do të jetë gjithmonë bashkimi dhe përmirësimi. Për këtë arsye, ky propozim nuk do të vazhdojë”, deklaroi presidenti i FIFA-s.
Projekti hasi në kundërshtimin e UEFA-s, Konfederatës së Amerikës së Veriut, Qendrore dhe Karaibeve (Concacaf) dhe Konfederatës Aziatike të Futbollit (AFC). UEFA paralajmëroi se të 55 federatat anëtare të saj mund të bojkotonin kompeticionet e FIFA-s, përfshirë Kupën e Botës, nëse plani do të miratohej.
Fillimisht, FIFA mbrojti nismën duke theksuar se “askush nuk po shet futbollin” dhe se konsultimet me federatat do të vazhdonin. Megjithatë, vetëm pak orë më vonë, edhe AFC iu bashkua qëndrimit të UEFA-s dhe Concacaf, duke e izoluar më tej Infantinon.
Presioni u shtua edhe nga brenda organizatës.
Këshilltari i presidentit, Carlos Cordeiro, dha dorëheqjen dhe e cilësoi projektin “një marrëveshje të keqe për federatat anëtare të FIFA-s, për futbollin dhe për të ardhmen afatgjatë të këtij sporti”.
Edhe drejtori operativ i FIFA-s, Kevin Lamour, deklaroi për Associated Press se stafi ishte “mashtruar” nga Infantino dhe se kishte vendosur të fliste publikisht, pavarësisht pasojave të mundshme për pozicionin e tij.
“Ky është projekti i një personi të vetëm. Jo vetëm që nuk duhet të vazhdojë, por ka ardhur koha që drejtuesit politikë të futbollit të bëjnë pyetjet e duhura dhe të marrin vendimet e duhura”, tha Lamour.
Sipas burimeve pranë FIFA-s, kundërshtimi i brendshëm ishte rritur në atë masë sa rrëzimi i projektit shihej vetëm si çështje kohe.
Pak ditë më parë, FIFA kishte prezantuar krijimin e një entiteti të ri privat, FIFA Forward Enterprises (FFE), i cili do të administronte eventet më të rëndësishme të organizatës, përfshirë Kupën e Botës dhe Kupën e Botës për Klube.
Plani parashikonte shitjen e 21% të aksioneve të FFE-së tek investitorë privatë, me synimin për të siguruar rreth 4.2 miliardë dollarë. Sipas FIFA-s, këto fonde do të shpërndaheshin menjëherë te 211 federatat anëtare përmes programit të ri “FIFA Fast-Forward Programme”.
Në total, organizata synonte që fondet për zhvillimin e futbollit të tejkalonin 10 miliardë dollarë gjatë katër viteve të ardhshme.
Megjithatë, UEFA, Concacaf dhe AFC, të cilat e kundërshtuan publikisht nismën, përfaqësojnë 137 nga 211 federatat anëtare të FIFA-s, çka e bënte miratimin e saj tepër të vështirë.
Konfederata e Amerikës së Jugut (CONMEBOL) nuk e refuzoi drejtpërdrejt projektin, por theksoi se çdo vendim financiar dhe komercial duhet t’i shërbejë interesave të futbollit dhe të mos vendoset mbi thelbin e sportit.
Çfarë do të thotë kjo për të ardhmen e Infantinos?
Tërheqja e planit ka ngritur pikëpyetje edhe për të ardhmen politike të Gianni Infantinos në krye të FIFA-s. Ai drejton organizatën që prej vitit 2016, kur pasoi Sepp Blatterin, dhe deri tani konsiderohej favorit për një mandat të ri në zgjedhjet e marsit 2027.
Megjithatë, kundërshtimi i hapur nga federatat më të fuqishme dhe humbja e mbështetjes nga disa bashkëpunëtorë të afërt kanë dobësuar ndjeshëm pozitat e tij.
Presidentja e Federatës Norvegjeze të Futbollit, Lise Klaveness, deklaroi për median VG se përshtypja e përgjithshme është se Infantino ka humbur një pjesë të konsiderueshme të besimit.
Sipas analizës së The Athletic, kjo përbën një goditje serioze për kreun e FIFA-s. Ai e nisi javën duke promovuar të ardhurat rekord prej 15 miliardë dollarësh nga Kupa e Botës për meshkuj dhe duke u konsideruar favorit për një tjetër mandat. Por reagimi i koordinuar i UEFA-s, Concacaf dhe AFC, i shoqëruar me kritikat e figurave të afërta brenda organizatës, e ka vendosur në një pozitë të vështirë politike.
Ajo që filloi si një debat mbi një model të ri financimi është shndërruar tashmë në një provë për të ardhmen e tij në krye të futbollit botëror.
Afati për paraqitjen e kandidaturave për zgjedhjet e vitit 2027 skadon në nëntor dhe pritet që gara politike brenda FIFA-s të jetë më e fortë se sa ishte parashikuar.
Çfarë parashikonte plani i Infantinos?
Sipas projektit, FIFA synonte të krijonte një kompani të re tregtare që do të administronte kompeticionet kryesore të saj, përfshirë Kupën e Botës. Investitorët privatë do të mund të blinin pjesë të vogla të kapitalit, pa fituar kontrollin e kompanisë.
Kjo kompani do të quhej FIFA Forward Enterprises (FFE).
Infantino kishte caktuar datën 19 shtator si afat që federatat kombëtare të pranonin projektin për të përfituar një pagesë fillestare prej 20 milionë dollarësh (rreth 15 milionë paund).
Një dokument prej 25 faqesh, i përgatitur nga banka investuese JP Morgan, parashikonte zgjerimin e turneve të FIFA-s dhe rritjen e të ardhurave, me objektivin që çdo federatë anëtare të përfitonte rreth 24 milionë euro gjatë ciklit 2035–2039.
Dokumenti përmendte gjithashtu zhvillimin e “nismave të reja të biznesit” dhe tërheqjen e talenteve të nivelit të lartë përmes shpërblimeve të bazuara në performancë. Në të, Kupa e Botës cilësohej si ngjarja sportive më e ndjekur në botë, ndërsa argumentohej se potenciali ekonomik i saj nuk ishte shfrytëzuar plotësisht. Megjithatë, nuk përfshihej asnjë referencë për zhvillimin e futbollit të femrave.
FIFA kishte bërë të ditur se grupi i investitorëve do të udhëhiqej nga Thrive Eternal, një fond amerikan kapitali sipërmarrës i themeluar nga Joshua Kushner, vëllai i Jared Kushner, dhëndrit të presidentit amerikan Donald Trump.
Vetë Trump, në reagimin e tij të parë mbi këtë çështje të premten, deklaroi se nuk kishte diskutuar me Infantinon për projektin. Të dy kanë ndërtuar një marrëdhënie të afërt që pas rikthimit të Trump në Shtëpinë e Bardhë për një mandat të dytë në vitin 2025.
©ZëriOnline
