Gjykata e Tiranës ka lënë në burg aktivisten turke Julide Yazici, e cila u arrestua dy ditë më parë në Sarandë.
Prokurori i çështjes, Françes Gani, kishte kërkuar caktimin e masës së sigurisë “arrest në burg”, deri në mbërritjen e dokumentacionit zyrtar për ekstradimin nga autoritetet turke. Këto të fundit kanë një afat prej 40 ditësh për të përcjellë dokumentet përkatëse.
32-vjeçarja, me profesion mësuese, u arrestua më 5 gusht në Sarandë, pasi gjatë verifikimeve rezultoi se ishte shpallur në kërkim ndërkombëtar nga Interpol Ankara.
Sipas autoriteteve turke, Yazici është dënuar nga Gjykata e Stambollit me 4 vite e 2 muaj burg për veprat penale “dhënie ndihme logjistike për organizatë terroriste” dhe “pjesëmarrje në organizatë terroriste”.
Nga ky dënim, sipas të dhënave të autoriteteve turke, asaj i kanë mbetur për të vuajtur 3 vite, 5 muaj e 22 ditë burg.
Pas caktimit të masës së sigurisë, Gjykata e Tiranës pritet të shqyrtojë në vijim kërkesën e Turqisë dhe të vendosë nëse Yazici do të ekstradohet ose jo.
Sipas informacioneve të policisë, shtetasja turke kishte përfituar azil politik në Francë, pasi pretendon se jeta e saj rrezikohet nëse kthehet në Turqi.
©ZëriOnline
